اليوم الكذب عا كل شفّة وتمّ

وما في حدا بالعيد مش مهتَّم

ما عاد ناقص غير جمعية

وكل البشر عا اسمها تنضمّ

ليش الكذب تا نْخصِّصو بنهار

ما زال عندو كل ليلة عيد

وعمرو ما بقبل نحصرو بْمشوار

ومع كل طلعة شمس لونو جديد

كل الدني عالكذب مبنيِّة

والكون كذبة بس مخْفيِّة

ولو ما الندي يكذب على الوردات

ما دابت الوردات حنيِّة

وتا تصدّقوا إنو الكذب موجود

شوفو القمر قدّيش عم يكذب

وشوفو عا بيتو من بعد ما يعود

عا وْراق جنح الليل شو بيكتب

شوفو الشمس من بعد ما بتغيب

ومن بعد ما العتمات تغمرنا

جِرح البحر إحساسنا بيصيب

وبتعيش بالكذبة خواطرنا

وهيك الربيع بيكذب علينا

وبيفلّ تا يصير الحلم مجروح

ومتلو السعادة المش بإيدينا

بتترك عطر كذباتها وبتروح

وشوفو التلج لمَّا الأرض بيزور

تا يلَّفها بالحب بتصدّق

لكن بعد ما الشمس تعطي النور

الكذبة ما فينا بْوابها نطبِّق

وبعد الهوى ما يصير كلُّو وْعود

والعين لمَّا من الأسى تدمع

ولمَّا على دروب العشق منعود

إلاَّ صدى الكذبات ما منسمع

ومهما الحقيقة نْشوفها صعبة

رح قولها واختم بقا اللعبة

وشو قيمة الكذبة بْشهر نيسان

ما زال كلُّو هالعمر كذبة

                                            ربيع لطيف