عالبحر... محروقة

عالبحر شفتك يمكن نهار الأحد

                     لكن ما بعرف ليش كنتي مْحمَّسي

تاري الرمل مشتاق عا لمسة جسد 

                     وانتي بِبالك عالرمل تتشمَّسي

اشلحتي تيابك رقْصت عروق الحجر            والمَيّ سكرت من قبل ما تنزلي

حتى الملح عا قد ما الموعد                       نطر لمّا شرب من كاس عاطفتك حِلي

وهيك الشمس غنِّت إلك موَّالها                              ونمتو سوا ولفّت عليك حْبالها

وعا قد ما انبسطت بِنومتها معك                           شفنا عا جسمك شو أثر أفعالها

ومعليش مهما حروقها تحطِّك بِضيق                     ومهما بْأسى تتوجَّعي عا دروبنا

بتستاهلي عا جسمك تحسِّي بْحريق                       تا تعرفي قيمة حريق      قلوبنا

ياما احترقنا وما سأل عنَّا حدا                          طْلبنا الدوا وما كان قلبك يستجيب

ومن وين بدّو يوصلّك صوت الصدى               وانتِ المرض بالوقت ذاتو والطبيب

حنِّي دخيلك لا بقا تتغنَّجي                             وتبقي احسبيني شمس عا شط الهوى

من ميل انتي تحتها بتتبنجِّ                        يوقلبي بِتاني  ميل  بيكون      ارتوى

ويا ريت كمشة رمل بخلق شي نهار                   يمكن كنت عن جسمك بلمّ الحلا

ولمّا تنامي بحوّلو كلوّ مزار                             وما بْنام إلاّ بعد ما كفيّ الصلا

ولو كنت نقطة مي بالبحر الغميق                      يمَّا شي موجة مارقة مرقة طريق

ما كنت بترك مطرح بجسمك حلو                     إلاّ ما منّو يرتوي جوعي العتيق

ويا بحر نحنا رغم ما فتحنا البنوك                    منَّا الصبايا تهرّبوا   تا يلحقوك

لاكن انتَ بالرغم مل كلك اذى                            وعا قد ما خنتن بيضلنّ يعشقوك

                                                                    ربيع لطيف