كلمة مؤسس جمعية بلدتي المهندس شاكر نون

مساء الخير،

آخر مرّة كنّا سوا عمّ منعمر ساحات حول الساحة... ساحة Baldati.com مطرح ما كل الناس من كلّ الألوان بيلتأيو كناس وبيجمعهم هدف واحد ورؤيا وحدة وآخر قرار أخدناه بهاك الساحة المهّمة ....مهّمة... مهّمة

مهّمتنا إنّو نلتقي ونجمع ناس عندهن النيّة الطيّبة وحسّ المسؤوليّة ...وإيد إيد نتحرك كمجتمع متضامن... نخطط ، نطوّر ، نعّمر وندير. حلول مستدامة لمجتمعاتنا وين ما كنّا بالعالم مستفيدين من التقنيات المتطورة، لتحسين مستوى حياة الإنسان .

وسميّنا هالمهمّة Mission Of Baldati وال Mission بدها Vision

 وال Vision لل2010 نكون صرنا مثال يحتذى لباقي المجموعات والجمعيّات بالتخطيط والإدارة والتنفيذ. ونقدر نتخطى ونكسر رقم الخمسميّة مجموعة على موقع Baldati.com ناشطة ، وفاعلة ، وحيّة .

سمّوها أحلام سمّوها أوهام، بس إذا بدّك تحلم حلام تكون أمير، وإذا بدك تتكرّم ...بدّك تكون وزير .

خلص المزح وصار وقت الجدّ كيف بدّك تغيّر مجتمع تعب، وزهق، وقرف من التنظير...ورح نعمل ...وبدنا نعمل...؟.

 طيب إذا جرّبنا نرد الناس لضيعها على مدى عشرين سنة، وما رجعوا... يا إمّا الناس ما بداّ... يا إمّا ما بدّن ياها ترجع... يا إمّا الزمن تغيّر، وهيدا الأرجح .

بزمن الطيّارة والسيّارة والإنترنت ما بقا حدا يرضى بس... بالكلأ والماء ...وعمّر يا معلّم لعمار.... وما رح نركع

 ولمّا الغيتار والدرامز بيفوتو عا بيت الصلى حلا بقى الضيعة تكون على الإنترنت، ومش بس الضيعة ،الضيعة وكل مؤسساتها.... الساحة، الدكان، شيخ الصلح، المدرسة، والجامعة ...إيه الجامعة ليش لأ ..... Baldati academy جامعتي في بلدتي.

جامعة مش متل كل الجامعات ، لا فيا قسط ، وهيدي أحلى شي، ولا فيا أوتوكار ولا عجقة سير ولا شو بلبس اليوم

إنت وببيتك والكمبيوتر إدامك. وبين إيديك كل يلي بيلزمك لتكون عضو فاعل بيلّي منسمّي مجتمع مدني... بمجال إختصاصك فيد غيرك ، وغيرك بمجالو عم بيفيدك.

صحافي: ومنتعلّم كيف نصنع خبر ، ونعمل reportage ، ونسلسل أفكارنا ونعمل إعلام مناطقي.

دستور: نفهم كيف القانون بيصير عقد بين المواطنين وتحت سقفو مصالح الناس مأمنّة والعدل سيّد الأحكام.

التنكنولوجيا: إنترنت ، GPS ، كل التقنيّات الجديدة يلي ممكن تسهل حياتنا وتوفّر وقتنا وهيك علّمني يلي بتعرفوا وبعلمك يلّي بعرفوا ، وشو صح لما قالوا.... الثقافة هي يللي بتبقى من بعد من نكون نسينا كل شي.

هيك التغير بيبدا بالثقافة لمّا مننسى الكليشاهات ويللي منرددا متل الببغا ومنصير نفكّر ونتفاعل ونتطورّ كبشر.

وبالنهاية شكر لمعالي وزير الأعلام الدكتور متري للرعاية الدايمة لبلدتي.

شكر للشعب الأميركي من خلال الUSAID يللي موّل هالمشروع.

شكر لفريق ال OTI .

شكر لفريق عمل بلدتي.

والشكر الكبير لأول 150 مشترك آمنوا بهالمشروع ووعدوا إنّوا ينشرووا بقراهم ومجتمعاتهم وجمعياتهم ، وال150 يصيروا 150 مليون.

مساء الخير.

الاونسكو 21/10/2008