هديّة

قالوا إلي عالعيد   شو عامل                               وشو جبت للأحباب عيدية

قلت السنة هالعيد مش كامل                                   ودايب من الأشواق حنيّة

حباب القلب لا تسألوا شو بعاد                            وبعد المسافة يبسّ ورودي

ومهما إنحكى شو قيمة الأعياد                            إلا إذا الأحباب   موجودي

ويا بلسم جروحي إلك مشتاق                              ومحتار بدي جبلك   هدية

ولا تسألي قديش في اشواق                               الأشواق زرعت حالها فيي

ويمكن كنت وردة ملاني سحر                           بجبلك تا تحضن ليل  أحلامك

لكن الوردة  بخاف تفقع   قهر                            وخايف خجل ما تموت قدامك

ويمكن كنت بسكب عا شعرك عطر                     وطول السنة  ما بمنعو  عنكّ

لو ما يا حبّي يكون    عطر  الزهر                      اخد   رحيقو   وريحتو  منكّ

ويمكن كنت تا إنتهي من الامر                            بهدي  خمر , لكن      بألطافك

خايف بدل ما تسكري عا الخمر                          يصير الخمر سكران عا شفافك

ويمكن كنت بهدي إلك  فستان                            حتى عا جسمك  يكتمل  كسمو

لكن نسيت   الورد   بالبستان                              إنو  ما حطّ   تياب عا  جسمو

وجربت إهديكي دهب  وكنوز                            ما قدرت لاقي   كنز عا  قدكّ

ومهما برمت بالكون ما بيجوز                           يخلق كنز   تا ينوضع    حدكّ

ويمكن عيوني بشيلها والريف                           وبسكب حياتي دموع  بكفوفك

لكن إذا هديتك  عيوني   كيف                           معقول إقدر   بعدها     شوفك

وعني بعد ما الحل صار بعيد                           عقلي عا  قلبي   توجهّ    وقلوّ

شو بعد   ممكن تنهدى  بالعيد                           ما زال    معها   عمرنا    كلوّ

                                                                                                                                                                            ربيع لطيف